Коми гижӧдын вуджӧдӧм вылӧ выль программа-словар!!!

Пекнича рытӧ Ӧндрей Чемышевкӧд ноксьыштім выль программа-перенос серти... Ставсӧ пуктім InDesign 6.0 версияӧ, сы вӧсна мый словарсӧ программаыс ас пытшкас кутӧ. Ноксьыштім часӧн джынйӧн, видлім... Ставыс артмӧ. Коми гижӧдъяс аддзӧ и вуджӧдӧ. Сӧмын Ӧньӧ Лавсянь колис лӧсьӧдны да стӧчмӧдны вуджӧдӧм серти ӧткымын корӧм. Чайта, лӧсьӧдас Ӧньӧ Лав ӧдйӧ, Ижкарысь воӧм бӧрын.

Тайӧ уджыс лоӧ кокньӧдӧн коми газет да небӧг лӧсьӧдысьяслы. Тшӧтш и коми гижӧдъяс LibreOffise программаын набирайтігӧн.

Корректор-ёртъяслы этшаджык удж лоӧ вӧчны, синныс налӧн дзикӧдз дулаліс а то...

Ӧндрей fu-lab сайт вылӧ пуктыны кӧсйис вӧчӧмторсӧ, сідзкӧ вӧчӧй аслыныд, да водзӧ гижасьӧй....

14:56

Плесовскийлӧн гижӧд чукӧр - выль книгаын!!!

Талун аддзи выль книгалысь петӧм йылысь юӧр. Плесовскийлысь босьтӧм рукописнӧй гижӧдъяссӧ йӧзӧдісны торъя книгаӧн. Пекничаӧ лоӧ выльпеткӧдлӧм. Колӧ ветлыны.

А ме, издатель, вӧчи водзӧ повесьт-мойдъяса выль сборник, эштӧді серпасъяснас кык гижӧд. Аски кутам видзӧдавны да мӧвпавны-сёрнитны лӧсьӧдӧм йывсьыс. Радейтӧмӧн кӧ вӧчан ассьыд уджтӧ, лыддьысьысьыслы любӧ весиг лоӧ босьтны киас. Весиг Ӧньӧ Лавлы, сійӧ ӧд чукӧртӧ комиӧн лэдзӧм небӧгъяс аслас базаӧ.

Колян пекничаӧ шыӧдчисны тшӧтш лыддьыны примернӧ книга лэдзӧм вылӧ смета. Вӧчи. Ӧні думайта, повзисны или эз шыӧдчысьясыс. Сідзкӧ босьтны, кор юаласны, уна-ӧ сувтас книга лэдзны? Стӧча веськыда он шу. Колӧ унатор тӧдны книга пытшкӧссьыс. Лыддьытӧг шуан, мый сувтас 10 шайт, а збыльвылас лоӧ 100 шайт. Сэки мый? Ва визувтіс нин, он нинӧм бергӧд. Кутам ставсӧ юр визьяс мӧвпалӧм отсӧгӧн вӧчны-лӧсьӧдны... Став бурсӧ.

А тэ велӧдан асьтӧ?

Бур лун ставныдлы! Йирым тӧлысь мунӧ водзӧ... ..................................................  Он и тӧдлы, вӧльгым воас. Бӧръя некымын лунӧн нокси небӧг дасьтӧмӧн. Йирым тӧлысь помӧдз колӧ дасьтыны да лэдзны нёль небӧг: кык комиӧн да кык рочӧн. Сы вӧсна ог и петкӧдчыв йӧз син водзӧ, Интернет отсӧгӧн ёртася да телепон пыр. Мойд чукӧр петас (рочӧн сӧмын), Войвыв кодзувъяс серияын Г.Бутыревалӧн, Н.Тюрнинлӧн сьыланкывъяса "Асъя сьыланкыв" сборник и с.в.

Таво эг сет весиг социально значимӧй литература конкурс вылӧ некутшӧм небӧг. Мӧд во кежлӧ эм нин гижӧд список, тырмымӧн. Унасӧ босьтны нинӧмла, асьтӧ сӧмын нартитан юр висьӧмӧн.

Да, быд книга вӧчигӧн тӧдмалан выльтор. Думайта, и быд удж вӧчигӧн сідзи артмӧ. Век асьтӧ велӧдан, содтан тӧдӧмлун. А ті асьнытӧ велӧданныд?

А тэ уджалан Интернет отсӧгӧн?

Бур асыв, коми йӧз! Талун тай водз садьми, да пырысьтӧм пыр пукси блогӧ. Кӧть нин ас дум пасйыштны, да водзӧ вылӧ ныр визь паськӧдны. Бӧръя кык луннас уджалі гортын ноут сайын. Интернет тшӧтш уджалӧ. Бур жӧ вӧлӧм Интернетнад. Ӧчереднӧй книга дасьтігӧн гижаси составителькӧд да серпасалыськӧд ӧтпыр. Вӧчим ӧти удж, кӧть ӧта-мӧднымӧс ог аддзӧй. Серпасалысь ӧдйӧ вӧчӧ тырмытӧмтор серпасъясын да ыстӧ меным, ме водзӧ дасьта: йитла серпас да пукта макетӧ. Сы бӧрти ыста лыддьыны. Правка ыстӧны торйӧн, пыртны да вежлавны абу сьӧкыд. Гӧгӧрвоана ставыс, комиӧн нӧшта гижасям. Гашкӧ, водзӧ вылӧ татшӧмсяма уджӧдз и воам. Арендуйтны кытӧнкӧ ичӧтик пельӧс лоӧ зэв дона. А тадзсӧ уджавны меным воӧ сьӧлӧм вылӧ. Ӧньӧ Лав тай висьталіс неважӧн, ӧні эм пӧ сэтшӧм программа, кытчӧ пуктан колана гижӧд и ӧтпыр позьӧ сійӧс вежлавны, содтавны, чинтавны торйӧн уналаын олысь йӧзлы ӧтпыр. Уна тор на ми ог тӧдӧй тайӧ олӧмас, бытьӧн велӧдчам, мед кокньӧдны ассьыным колана удж...

Кӧч бӧжыд дженьыд

Талун вӧлі кӧч тӧлысьлӧн бӧръя лун. Кутам виччысьны лым, гажӧй бырис нин. Гашкӧ удайтчас ньӧбны некымын воӧн кӧсйӧм лыжи гоз. Котралыштны матысса трасса вывті, лолалыштны сӧстӧм сынӧднас. А сэсся шонтысьны пӧсь пывсянын... 

Яран дінысь чукӧртӧм фольклор материал выль небӧгын!!!

Бур рыт, "Интернеттӧгыд овны" вермытӧмъяс!!! Ме виччыси 12 лун, 12 час, да 12 минут, сы бӧрын пукси гижны водзӧ. Тайӧ лунъяссӧ эз удайтчи матыстчывны киясӧн ыджыд шыпасъяса ноутбук кнопкаяс дінӧ. Но кӧть шойччӧдышті киясӧс. Талун лыдди мукӧдлысь блогын гижӧдъяссӧ, тӧдчӧ, коді-кыдз гижӧ да кутшӧм кыв пыртӧ гижӧдас. Воис сьӧлӧм вылӧ Баженовалӧн бӧръя гижӧдыс. Бур.

Но талун меным ковмис нӧшта лун быд пукавны да дасьтыны-эштӧдны яран дінысь Ӧльӧш Рассыхаевӧн чукӧртӧм фольклорнӧй материал книгаӧ лӧсьӧдӧм вылын. Артмис зэв солиднӧй небӧг, 500 сайӧ лист бок. Гижӧдыс мунӧ кык кыв вылын, рочӧн да коми изьва кывйӧн. Эм зэв интереснӧй материал. Удайтчас кӧ кодлыкӧ лыддьыны, оз кут жалитны, сы вӧсна мый книгасӧ кутасны лэдзны Нарьян-Марын, татчӧс войтырлы сюрас этша небӧг.

Меным колӧ на тшӧтш во помӧдзыс лэдзны сизим небӧг, но сы йылысь гижа книга петӧм бӧрын... Бур вой ставныдлы, шойччӧдӧй синтӧ...

Тэ дась ГТО сдайтіг кежлӧ?

Бур лун ставныдлы, Интернетын пукалысьяс!

Колис шойччан лун, ставныд гортса уджӧн ноксинныд. Ме, дерт, вотчышті неуна, сы вӧсна мый картупель ковмис босьтны, поводдяыс бур вӧлі да. Нопнад эз дыр удайтчи келавны вӧрті, но физзарядка кокыдлы да мыш-пельпомъяслы вӧлі.

Но матӧджык делӧ дінӧ. Мӧд восянь ковмас пӧ сдайтны ГТО, ставныслы бытьысьӧн. Но сэк жӧ шуӧны, коді кӧсйӧ. Рочӧн артмӧ: добровольно-принудительно. Сиктын олысьяс быд лун сдайтӧны норма, мӧс-кукань видзигӧн дыр пукавны он вермы, картупель пуктігӧн-босьтігӧн сідзжӧ. Ва новлыны-ваявны колӧ быд лун, абу ӧд карсаяслӧн кодь оланінъясыд сиктад. Пес вайны-пилитны-поткӧдлыны-тэчны да пач дорӧдз пыртлыны - бара нок. Олӧмаджык йӧзлы ГТО-тӧгыд овсьӧ бура. Ставыс тырмӧ морт олӧмын, сӧмын эн дышӧдчы. А дыш мортыдлы и нинӧм оз ков.

Ми томӧсь на да, бытьысьӧн ковмас норматӧ сдайтны, гашкӧ кутшӧмкӧ списокӧ сюйасны. Колӧ ӧд асьтӧ здоров мортӧн видзны, мед друг отсӧг кӧ ковмас тэсянь, мед вӧлін пыр дась...