четверг, 13 ноября 2014 г.

Коми да саам войтыр - бур ёртъяс!!!

Бур рыт, ёртъяс!
Ме дыр кад чӧж эг пуксьыв гижны, ас пытшкын вӧлі куш. Петкӧдны нинӧм вӧлі. Гашкӧ, уна удж понда эг слӧйми гижны. Кыдз быд гижысьлӧн овлӧ, творческӧй кризис, менам сідз жӧ, буракӧ.

Талун кӧсъя гижыштны выль сборник дасьтӧм йылысь. Чайта, сійӧ артмас куим: коми-саам-роч, кыв вылын. Октябрина Воронова, медводдза саам кыв вылын гижысь нывбаба, гашкӧ кодлыкӧ лача вичмис лыддьыны сійӧс (тӧдӧ кӧ саам кыв). Сы нимӧн лӧсьӧдӧма музей, кытысь позьӧс тӧдмасьны сылӧн олӧмӧн.
Миян коми гижысь, Евгений Козлов, важӧн кодь нин вуджӧдліс сылысь кывбуръяс. Бура артмӧма. Ӧні нӧшта на содтӧма вуджӧдӧмасӧ, артмӧ ӧтувъя чукӧртӧмыс ыджыд сборник вылӧ. А роч кыв вылӧ вуджӧдаліс кывбуръяссӧ Володь Смирнов.
Ми асьным ог тӧдӧй саам кыв, но артмис сідз, мый менам эм некымын саам кыв тӧдысь морт. Олӧны Кола кӧджын, Ловозеро сиктын. Ӧтиыс - Ирина Кобелева. Найӧ отсасьӧны саам кыв вылын лӧсьӧдны кывбуръяссӧ, кутшӧмсюрӧ тӧдтӧм кывъяс вуджӧдӧны. Ог тӧд мыйла, но кыла ачымӧс матын налӧн олӧмӧ. Уна во ёртасьӧм бӧрад гӧгӧрвоан найӧс бурджыка. Босьтны кӧ изьваса войтырӧс, унаӧн ХХ нэмӧ вуджисны овны Кола кӧджӧ. Коми вирыс вежсис и саам виркӧд. Чайта, уналӧн ӧні эм рӧдня морт сэні.
Таво тулыс артмис лӧсьӧдны Валентина Кузнецовалысь ичӧтик гижӧдъяса "Мый тӧда - сійӧс и висьтала" нима сборник. Ачыс сійӧ олӧ Ловозеро сиктын, но бура тӧдса сыктывкарын олысь Семен Терентьевкӧд. Сылӧн отсӧгӧн и петіс сборник чукӧрыс. А Терентьевлысь некымын во сайын тшӧтш ме лӧсьӧдлі "Заранъяс" книга, колис бурӧн паметьӧ сылӧн гижӧдъясыс. Висьтала нӧшта ӧтитор. Семен Терентьев некымын во сайын вуджӧдаліс Перымса Степан шыпасъяс вылӧ уна гижӧд. Ачыс пасъяліс да вӧчис ичӧтик брошюра кодь книгаяс. Зэв аслыспӧлӧсӧсь. Ӧньӧ Лав весиг унатор пыртіс сканируйтӧмӧн компьютер пытшкӧ. А бӧръя кадас кар уличаяс вылысь позьӧ паныдавны уна сёртӧм Степан шыпасъясӧн гижӧд.
Но мунам водзӧ. Кутам виччысьны выль небӧг, чайта, локтан воӧ петас.




вторник, 28 октября 2014 г.

Коми гижӧдын вуджӧдӧм вылӧ выль программа-словар!!!

Пекнича рытӧ Ӧндрей Чемышевкӧд ноксьыштім выль программа-перенос серти... Ставсӧ пуктім InDesign 6.0 версияӧ, сы вӧсна мый словарсӧ программаыс ас пытшкас кутӧ. Ноксьыштім часӧн джынйӧн, видлім... Ставыс артмӧ. Коми гижӧдъяс аддзӧ и вуджӧдӧ. Сӧмын Ӧньӧ Лавсянь колис лӧсьӧдны да стӧчмӧдны вуджӧдӧм серти ӧткымын корӧм. Чайта, лӧсьӧдас Ӧньӧ Лав ӧдйӧ, Ижкарысь воӧм бӧрын.
Тайӧ уджыс лоӧ кокньӧдӧн коми газет да небӧг лӧсьӧдысьяслы. Тшӧтш и коми гижӧдъяс LibreOffise программаын набирайтігӧн.
Корректор-ёртъяслы этшаджык удж лоӧ вӧчны, синныс налӧн дзикӧдз дулаліс а то...
Ӧндрей fu-lab сайт вылӧ пуктыны кӧсйис вӧчӧмторсӧ, сідзкӧ вӧчӧй аслыныд, да водзӧ гижасьӧй....
14:56

вторник, 7 октября 2014 г.

Плесовскийлӧн гижӧд чукӧр - выль книгаын!!!

Талун аддзи выль книгалысь петӧм йылысь юӧр. Плесовскийлысь босьтӧм рукописнӧй гижӧдъяссӧ йӧзӧдісны торъя книгаӧн. Пекничаӧ лоӧ выльпеткӧдлӧм. Колӧ ветлыны.

А ме, издатель, вӧчи водзӧ повесьт-мойдъяса выль сборник, эштӧді серпасъяснас кык гижӧд. Аски кутам видзӧдавны да мӧвпавны-сёрнитны лӧсьӧдӧм йывсьыс. Радейтӧмӧн кӧ вӧчан ассьыд уджтӧ, лыддьысьысьыслы любӧ весиг лоӧ босьтны киас. Весиг Ӧньӧ Лавлы, сійӧ ӧд чукӧртӧ комиӧн лэдзӧм небӧгъяс аслас базаӧ.

Колян пекничаӧ шыӧдчисны тшӧтш лыддьыны примернӧ книга лэдзӧм вылӧ смета. Вӧчи. Ӧні думайта, повзисны или эз шыӧдчысьясыс. Сідзкӧ босьтны, кор юаласны, уна-ӧ сувтас книга лэдзны? Стӧча веськыда он шу. Колӧ унатор тӧдны книга пытшкӧссьыс. Лыддьытӧг шуан, мый сувтас 10 шайт, а збыльвылас лоӧ 100 шайт. Сэки мый? Ва визувтіс нин, он нинӧм бергӧд. Кутам ставсӧ юр визьяс мӧвпалӧм отсӧгӧн вӧчны-лӧсьӧдны... Став бурсӧ.

понедельник, 6 октября 2014 г.

А тэ велӧдан асьтӧ?

Бур лун ставныдлы! Йирым тӧлысь мунӧ водзӧ... ..................................................  Он и тӧдлы, вӧльгым воас. Бӧръя некымын лунӧн нокси небӧг дасьтӧмӧн. Йирым тӧлысь помӧдз колӧ дасьтыны да лэдзны нёль небӧг: кык комиӧн да кык рочӧн. Сы вӧсна ог и петкӧдчыв йӧз син водзӧ, Интернет отсӧгӧн ёртася да телепон пыр. Мойд чукӧр петас (рочӧн сӧмын), Войвыв кодзувъяс серияын Г.Бутыревалӧн, Н.Тюрнинлӧн сьыланкывъяса "Асъя сьыланкыв" сборник и с.в.
Таво эг сет весиг социально значимӧй литература конкурс вылӧ некутшӧм небӧг. Мӧд во кежлӧ эм нин гижӧд список, тырмымӧн. Унасӧ босьтны нинӧмла, асьтӧ сӧмын нартитан юр висьӧмӧн.
Да, быд книга вӧчигӧн тӧдмалан выльтор. Думайта, и быд удж вӧчигӧн сідзи артмӧ. Век асьтӧ велӧдан, содтан тӧдӧмлун. А ті асьнытӧ велӧданныд?

среда, 1 октября 2014 г.

А тэ уджалан Интернет отсӧгӧн?

Бур асыв, коми йӧз! Талун тай водз садьми, да пырысьтӧм пыр пукси блогӧ. Кӧть нин ас дум пасйыштны, да водзӧ вылӧ ныр визь паськӧдны. Бӧръя кык луннас уджалі гортын ноут сайын. Интернет тшӧтш уджалӧ. Бур жӧ вӧлӧм Интернетнад. Ӧчереднӧй книга дасьтігӧн гижаси составителькӧд да серпасалыськӧд ӧтпыр. Вӧчим ӧти удж, кӧть ӧта-мӧднымӧс ог аддзӧй. Серпасалысь ӧдйӧ вӧчӧ тырмытӧмтор серпасъясын да ыстӧ меным, ме водзӧ дасьта: йитла серпас да пукта макетӧ. Сы бӧрти ыста лыддьыны. Правка ыстӧны торйӧн, пыртны да вежлавны абу сьӧкыд. Гӧгӧрвоана ставыс, комиӧн нӧшта гижасям. Гашкӧ, водзӧ вылӧ татшӧмсяма уджӧдз и воам. Арендуйтны кытӧнкӧ ичӧтик пельӧс лоӧ зэв дона. А тадзсӧ уджавны меным воӧ сьӧлӧм вылӧ. Ӧньӧ Лав тай висьталіс неважӧн, ӧні эм пӧ сэтшӧм программа, кытчӧ пуктан колана гижӧд и ӧтпыр позьӧ сійӧс вежлавны, содтавны, чинтавны торйӧн уналаын олысь йӧзлы ӧтпыр. Уна тор на ми ог тӧдӧй тайӧ олӧмас, бытьӧн велӧдчам, мед кокньӧдны ассьыным колана удж...

вторник, 30 сентября 2014 г.

Кӧч бӧжыд дженьыд

Талун вӧлі кӧч тӧлысьлӧн бӧръя лун. Кутам виччысьны лым, гажӧй бырис нин. Гашкӧ удайтчас ньӧбны некымын воӧн кӧсйӧм лыжи гоз. Котралыштны матысса трасса вывті, лолалыштны сӧстӧм сынӧднас. А сэсся шонтысьны пӧсь пывсянын... 

вторник, 23 сентября 2014 г.

Яран дінысь чукӧртӧм фольклор материал выль небӧгын!!!

Бур рыт, "Интернеттӧгыд овны" вермытӧмъяс!!! Ме виччыси 12 лун, 12 час, да 12 минут, сы бӧрын пукси гижны водзӧ. Тайӧ лунъяссӧ эз удайтчи матыстчывны киясӧн ыджыд шыпасъяса ноутбук кнопкаяс дінӧ. Но кӧть шойччӧдышті киясӧс. Талун лыдди мукӧдлысь блогын гижӧдъяссӧ, тӧдчӧ, коді-кыдз гижӧ да кутшӧм кыв пыртӧ гижӧдас. Воис сьӧлӧм вылӧ Баженовалӧн бӧръя гижӧдыс. Бур.
Но талун меным ковмис нӧшта лун быд пукавны да дасьтыны-эштӧдны яран дінысь Ӧльӧш Рассыхаевӧн чукӧртӧм фольклорнӧй материал книгаӧ лӧсьӧдӧм вылын. Артмис зэв солиднӧй небӧг, 500 сайӧ лист бок. Гижӧдыс мунӧ кык кыв вылын, рочӧн да коми изьва кывйӧн. Эм зэв интереснӧй материал. Удайтчас кӧ кодлыкӧ лыддьыны, оз кут жалитны, сы вӧсна мый книгасӧ кутасны лэдзны Нарьян-Марын, татчӧс войтырлы сюрас этша небӧг.
Меным колӧ на тшӧтш во помӧдзыс лэдзны сизим небӧг, но сы йылысь гижа книга петӧм бӧрын... Бур вой ставныдлы, шойччӧдӧй синтӧ...