Кӧч бӧжыд дженьыд

Талун вӧлі кӧч тӧлысьлӧн бӧръя лун. Кутам виччысьны лым, гажӧй бырис нин. Гашкӧ удайтчас ньӧбны некымын воӧн кӧсйӧм лыжи гоз. Котралыштны матысса трасса вывті, лолалыштны сӧстӧм сынӧднас. А сэсся шонтысьны пӧсь пывсянын... 

Яран дінысь чукӧртӧм фольклор материал выль небӧгын!!!

Бур рыт, "Интернеттӧгыд овны" вермытӧмъяс!!! Ме виччыси 12 лун, 12 час, да 12 минут, сы бӧрын пукси гижны водзӧ. Тайӧ лунъяссӧ эз удайтчи матыстчывны киясӧн ыджыд шыпасъяса ноутбук кнопкаяс дінӧ. Но кӧть шойччӧдышті киясӧс. Талун лыдди мукӧдлысь блогын гижӧдъяссӧ, тӧдчӧ, коді-кыдз гижӧ да кутшӧм кыв пыртӧ гижӧдас. Воис сьӧлӧм вылӧ Баженовалӧн бӧръя гижӧдыс. Бур.

Но талун меным ковмис нӧшта лун быд пукавны да дасьтыны-эштӧдны яран дінысь Ӧльӧш Рассыхаевӧн чукӧртӧм фольклорнӧй материал книгаӧ лӧсьӧдӧм вылын. Артмис зэв солиднӧй небӧг, 500 сайӧ лист бок. Гижӧдыс мунӧ кык кыв вылын, рочӧн да коми изьва кывйӧн. Эм зэв интереснӧй материал. Удайтчас кӧ кодлыкӧ лыддьыны, оз кут жалитны, сы вӧсна мый книгасӧ кутасны лэдзны Нарьян-Марын, татчӧс войтырлы сюрас этша небӧг.

Меным колӧ на тшӧтш во помӧдзыс лэдзны сизим небӧг, но сы йылысь гижа книга петӧм бӧрын... Бур вой ставныдлы, шойччӧдӧй синтӧ...

Тэ дась ГТО сдайтіг кежлӧ?

Бур лун ставныдлы, Интернетын пукалысьяс!

Колис шойччан лун, ставныд гортса уджӧн ноксинныд. Ме, дерт, вотчышті неуна, сы вӧсна мый картупель ковмис босьтны, поводдяыс бур вӧлі да. Нопнад эз дыр удайтчи келавны вӧрті, но физзарядка кокыдлы да мыш-пельпомъяслы вӧлі.

Но матӧджык делӧ дінӧ. Мӧд восянь ковмас пӧ сдайтны ГТО, ставныслы бытьысьӧн. Но сэк жӧ шуӧны, коді кӧсйӧ. Рочӧн артмӧ: добровольно-принудительно. Сиктын олысьяс быд лун сдайтӧны норма, мӧс-кукань видзигӧн дыр пукавны он вермы, картупель пуктігӧн-босьтігӧн сідзжӧ. Ва новлыны-ваявны колӧ быд лун, абу ӧд карсаяслӧн кодь оланінъясыд сиктад. Пес вайны-пилитны-поткӧдлыны-тэчны да пач дорӧдз пыртлыны - бара нок. Олӧмаджык йӧзлы ГТО-тӧгыд овсьӧ бура. Ставыс тырмӧ морт олӧмын, сӧмын эн дышӧдчы. А дыш мортыдлы и нинӧм оз ков.

Ми томӧсь на да, бытьысьӧн ковмас норматӧ сдайтны, гашкӧ кутшӧмкӧ списокӧ сюйасны. Колӧ ӧд асьтӧ здоров мортӧн видзны, мед друг отсӧг кӧ ковмас тэсянь, мед вӧлін пыр дась...

Ельдӧг тшак

Талун пекнича, а сідзкӧ аски да аскомысь бара на позьӧ шойччыштны вӧрын тшак либӧ пув вотігмоз. Петалӧма нин ельдӧг. Сэтшӧм окота сунавны кор пиын да корсьны тайӧ гӧна дора еджыд тшаксӧ. Ӧні оз нин усьлывлі син улӧ кӧч йӧла ельдӧг. А сійӧ нӧшта на пӧтӧсаджык да чӧскыдджык прамӧй ельдӧгсьыс. Аслам олӧмын сӧмын ӧтчыдысь удайтчыліс аддзыны ӧти татшӧм тшак. Дульва петӧ. Дугда гижны ӧні, кынӧм сюммис...

Бутырева Галина Васильевналӧн регыд лоас тшупӧда пас!!!!

Талун босьтчи дасьтыны сы йылысь фотояса да гижӧдъяса ичӧтик буклет. Быд гижысьлысь Гижысь котыр дасьтӧ татшӧм буклет. Эм нин Столповский Пётрлӧн, Ульянов Сашлӧн, Щукин Микулайлӧн, Мирошниченко Надеждалӧн... Лача кута, артмас бура...

Выль "Арт" журналлӧн петас

Дас час асывсянь талун разӧдім выль "Арт" журналлысь петас. Воис сӧмын налы, коді гижӧдчис журнал вылӧ. Тавося коймӧд номерыс разалас ӧдйӧ, гижӧдсӧ пыртім Сорокин йылысь, тшӧтш и сылысь кывбуръяс да "Предтеча" роман. "Проза. Поэзия" разделын йӧзӧдім кык юбиляр: Г. Бутырева да А. Поповлысь кывбуръяссӧ. Павел Лимеров Г. Бутыревакӧд дасьтіс интервью. Номерас пырис Ю. Екишевлӧн "Наскальные рисунки" гижӧдысь некымын глава. Водзӧ лоӧ на. Верманныд тӧдмасьны, бура гижӧ. "Арт-факт" разделын Ирина Котылева тӧдмӧдӧ А.Размановалӧн "ПУТЕШЕСТВИЕ или как зыряне Кандинского околдовали" выставкаӧн. Нӧшта ӧти гижӧд сылӧн: "Мужчина и Женщина. Археология архетипа": мифопоэтические блуждания в контексте выставочного пространства". Гажа серпаса кыкнан гижӧдыс. "Обзоры. Новости. Письма" разделын ті верманныд лыддьыны Яренск, Вӧлӧгда, Верный каръясті Иван Куратовлы сиӧм ветлӧмъяс йылысь. Журнал дінас эм приложение "Александра Куликова. Графика". Чайта, артмас уналы босьтлыны да лыддьыны "Арт" журналлысь 3-ӧд номерсӧ. Выль паныдасьлӧмӧдз.

Бур лун ставныдлы. Талунсянь ме дасьті ассьым гижасян лист бок. Виччысьӧй выль юӧр.